Dominica l'8 ëd Dzèmber 2019

Leture bibliche dal lessionari ecumenich për Dominica l'8 ëd Dzèmber 2019 - Sconda duminica d'Avent

Isaia 11:1-10 - Ël dissendent dël rè David

"Da la sëppa ‘d Jesse [la famija ‘d David] a seurtirà n’arbut - vera, un branch neuv ch’a portrà ëd frut da la veja rèis.  Lë Spirit ëd Nosgnor as poserà an sù chiel: lë Spirit ëd saviessa e d’intendiment, lë Spirit ëd consèj e ‘d fòrsa, lë Spirit ëd conossensa e ‘d timor reverensial për Nosgnor. L’ubidiensa a Nosgnor a sarà soa gòj. A giudicrà pa da le aparense, nì a giudicrà për sentì dì. Chiel a rendrà giustissia ai bisognos e giuste sentense a publicherà an favor ëd coj ch’a son crasà. La tèra a sarà socrolà da la fòrsa ‘d soa paròla e con ël fià ‘d soa boca a farà meuire ij pervers. La giustissia a sarà tanme na sëntura ai sò fianch, e la vrità a-j sarà tanme na còta. An col dì lì ël luv a vivrà ansem al babero, la pantera a starà cogià con ël cravòt. Ël vailet e ‘l leon a mangeran ansema, e na masnà a-j mnerà. La vaca a pastorerà davzin a l’orsa e ij sò cit as cogeran ansema. Ël leon a mangerà la paja tanme ‘l beu. Na masnà a podrà gieughe al sicur davzin al nì ëd na vipra. Éh, fin-a ‘n poparin a podrà fiché la man ant ël përtus ëd na serp. Gnun as farà ‘d mal an su tut ël mè mont sant, përchè ‘l paìs a sarà pien ëd gent ch’a conòss Nosgnor tanme j’aque a quato ‘l fond dël mar. Ant col dì lì l’arditè dël tròno ‘d David, l’arbut ëd Jesse, a sarà coma ‘n drapò ‘d salvëssa aussà an tut ël mond. Tute le nassion as sambleran dantorn a chiel e la tèra anté ch’a viv a sarà ‘n leugh glorios".

Roman 15:4-13

"Quand ch'i comissionoma a dj'ovrié un travaj da fesse, la paga che për lòn i-j doma, ëd sicur a l'é nen un cadò, na grassia ch'i-j foma, ma 'l pagament ëd lòn ch'a jë speta. Quand che, però, Nosgnor a considera un pecator na person-a giusta, chiel a lo fa, coma ch'a diso le Scriture, nen përchè col-lì a l'abia travajà, fàit quajcòsa 'd bon, ma përchè a l'é fidasse an Nosgnor ch'a përdon-a ij pecator. Ëdcò David a l'ha parlà 'd sossì quand ch'a fa la descrission ëd la gòj ch'a l'han coj ch'a son diciarà giust da Nosgnor sensa ess-lo vagnà. A dis: "Quanta gòj ch'a l'han coj ch'a l’han vëddù përdonesse soa dzubidiensa 'd lor e ij sò pecà butà fòra dla vista për sèmper.[ Quanta gòj ch'a-i sarà për coj ch'a l'han vëddù Nosgnor dëscanceleje ij pecà ch’a l'avìa pijane nòta ant sò liber!". Ora, costa benedission é-lo mach pr' ij Giudé, o é-lo 'dcò për j'àutre gent, ch'a ch'a conòsso nen la sirconcision? Bin, i l'oma fortì che Abraham a l'é stait considerà n'òm giust da Nosgnor për motiv ëd soa fej.  Ma quand é-lo che sossì a l'é capitaje? É-lo stàit diciarà giust apress ch'a l'é sugetasse a la sirconcision, o anans? A l'é ciair che Nosgnor a l'ha acetà Abraham, a l'ha aprovalo, anans ch'as sugetèissa a la sirconcision. La sirconcision, a l'era 'n segn, na marca, che Abraham a l'avìa an efet fidasse 'd Nosgnor, e che Nosgnor a l'avia an efet acetalo e diciaralo n'òm giust - fin-a d’anans ch'as sugetèissa a la sirconcision. A l'é parèj che Abraham a l'é dventà 'l pare spiritual ëd coj ch'a l'han la fej e ch'a son nen dij sirconcis. Ëdcò lor a son da consideresse dij giust për motiv ëd soa fej ëd lor. Abraham a l'é 'dcò 'l pare spiritual dij sirconcis, ma mach s' a l'han la midema sòrt ëd fej ch'a l'avìa Abraham anans ch'as sugetèissa a la sirconcision. A l'é ciair che la promëssa 'd Nosgnor ch'a l'avìa dàit la tèra antrega a Abraham[14] e ai sò dissendent, a l'era nen fondà an soa obediensa a la lej 'd Nosgnor, ma an sla giusta relassion con chiel, cola ch'a ven da la fej".

Maté 3:1-12 - Predicassion ëd Gioann Batìsta

Ora, ant col temp-là a l’è vnùje 'nt ël desert ëd la Giudèa Gioann Batista e a l’ha comensà a prediché. Sò mëssagi a l’era: “Pentive dij vòsti pëccà, përchè ‘l Regn dij cej a s’é fasse press”. Ëd Gioann a parlava ‘l profeta Isaìa, quand ch’a disìa: “A l’é la vos d’un ch’a crija ant ël desert: ‘Pronté la strà ‘d Nosgnor, spiané ij sò vieuj’”. Gioann a l’era vēstì con na vestimenta antërsùa ëd pèil grossé ‘d gamel e na sëntura ‘d coram antorn ai fianch. Sò mangé a l’era ‘d cravëtte e d’amel sarvaj. A 'ndasìo a trovelo ‘d gent ëd Gerusalem, da tuta la Giudèa e da tuta la region dël Giordan; a-j confessavo ij sò pëccà ‘d lor e as fasìo batesé da chiel ant ël fium Giordan. Ma quand ch’a vëddìa vàire dij Farisé e dij Sadducé ch’a vnisìo ‘dcò lor a fesse batesé, Gioann a l’ha dije: “Rassa ‘d vipre ch’i seve! Chi a l'é ch’a l’ha avisave dë schivié ël giudissi ch’a l’é press a ven-e? Dimostré, donca, con lòn ch’i feve ch'i seve pentì përdabon dij vòstri pëccà. A l’é nen pro ch’i dise l’un a j’àutri: ‘I l’avoma Abraham për pare’, përchè iv diso che Nosgnor a podrìa fé seurte magara da ste pere-sì 'd fieuj d’Abraham. Ora l’àpia a l’é già butà a la rèis ëd j’erbo, ëd manera che minca d’erbo ch’a fà nen ëd bon frut a và a esse tajà e campà ant ël feu. Për mi, iv bateso d’eva an segn ëd pentiment; ma col ch’a ven apress ëd mi a val pì che mi, i son gnanca degn ëd porteje soe sàndole: a sarà col-là ch’av batësrà dlë Spirit Sant e dël feu. A l’ha sò val an man e a farà soa àira neta ‘d pianta, e a ambaronrà sò furment ant ël grané, ma a farà brusé la paja al feu ch’as dëstissa mai pì.

Salm 72:1-7, 18-19.

"Nosgnor! Dà al rè d’amor për la giustissia! Dà al fieul dël rè toa dritura. Ch’a governa tò pòpol con giustissia, ch’a renda giustissia ai bisognos. Che le montagne a dago ‘d pas al pòpol, che toe colin-e a sio fosonante. Giutlo a dësfende ij pòver, a salvé le masnà dij bisognos e a crasé ij sò craseur. Ch’a l’àbio ‘d timor reverensial për ti antant ch’a splendriss ël sol e la lun-a a resta ant ël cél. Éh, për sèmper! Che ‘l govern dël rè a rinfranca tanme la pieuva ant la prima an s’ ëd prà d’erba pen-a tajà, tanme ‘d pieuva ch’a anrosa la tèra. Che la gent onesta e divòta a Nosgnor a dësbandissa tanme ‘d fior sota sò regn. Ch’a-i sia ‘d prosperità fosonanta fin tant ch’a-i sìa pì nen la lun-a. (...) Benedì a sìa Nosgnor Dé, ël Dé d’Israel, l’ùnich ch’a fà ‘d maravije! Ch’a sìa benedì për sèmper sò nòm glorios, che soa glòria a ampinìssa tuta la tèra. Amen! Amen!"

Preghiera: Nosgnor ëd misericòrdia! Ch’it l’has mandà ij tà mëssagé, ij profeta, për prediché ‘l pentiment e për pronté la stra për nòstra salvëssa: Dane la grassia dë scoté j’amoniment ch’an fan e ‘d chité nòstri pecà, përchè ch’i podoma saluté con gòj la vnùa ‘d Gesù Crist, nòst Redentor, ch’a viv e regna con Ti e con lë Spirit Sant, ora e për sèmper. Amen.