Chi ch'a j'ero ij barbèt?

Ij bàrba (o barbèt) a j'ero al prinsìpi ij predicator valdèis del secol XV. Doi për doi, a travërsavo, dë scondion, ël teritòri che a l’avìo fidaje, an visitand ij grop dij fidèj e ancontrandse con regolarità për discute ‘d chestion che riguardavo ël moviment valdèis, ch’a l’avìa spantiasse për tuta l’Euròpa. Soa atività a l’era motobin arzigosa e soèns a finiva ‘d manera tràgica a càusa dl’Inquisission. Ij barba as preparavo për soa mission an leug stërmà ciamà scholae andova ch’a studiavo ij test bìblich. La sernìa dël nòm “barba” a l’era për dësferensiesse dai prèive ch’as fasìo ciamè “padre”.An séguit, fra la gent, ël nòm “barbèt”, antrames ij catòlich, a l’era dovrà, ëd manera irònica, an rësguard a tuti ij protestant, e fin-a dj’ebreo.