Vive nen coma 'd fòj (Duminica 16/8/2015)

Vive nen coma 'd fòj

"Pijeve donca bin varda 'd vòstra condòta. Vive nen coma djë stùpid, ma con saviëssa. Perde nen ëd temp pressios, ma sfruté al màssim ël temp ch'i l'eve për fé lòn ch'a l'é bon, përchè ij dì ch'i vivoma a son gram. Pensje bin ansima prima 'd fé cheicòs: serche 'd capì lòn ch'a podrìa esse 'l volèj 'd Nosgnor. E ampinive nen ëd vin, përchè lolì a l'é la ruin-a dla vita, ma procureve d'esse ampinì dë Spirit Sant. Canté al Signor ëd salm, ëd làude e 'd cantich ëspirituaj, për l'edificassion ëd coj ch'a-j ëscoto. Ch'a sia cola la musica ch'i l'eve ant ël cheur! Rende sèmper grassie për ògni còsa a Dé, ch'a l'é nòstr Pare, an nòm ëd Nosgnor Gesù Crist" (Efesin 5:15-20).

Leture pr'  ël 16 Agost 2015 - Duminica dòp Pancòsta ch'a fà dodes: 1 Rè 2 (10-12); 3 (3-14); Salm 111; Efesin 5 (15-20); Gioann 6:51-58.

Dal përfond (Duminica 9 Agost 2015)

Leture bìbliche dël lessionari pr' ël 9 d'Agost 2015, duminica dòp Pancòsta ch'a fà ondes: 2 Samuel 18 (5-18, 15, 3-33);  Salm 130; Efesin 4:25-5:2; Gioann 6 (35, 41-51).

Doi dle leture bibliche dë sta duminica-sì a trato diret dla misericòrdia 'd Nosgnor ch'an përdona ij pecà e an salva grassie a lòn ch'a l'ha fàit Sò Fieul Gesù Crist quand ch'a l'é dasse për nojàutri coma 'n sacrifissi përfet e a l'é mòrt an s' na cros. L'òm o la fomna ch'as fida con tut sò cheur a Chiel, as rend cont, përchè l'Evangeli a-j lo certifica, ch'ij sò pecà, për lòn, a son ëstaje përdonà e adess a l'é an pas con Dé e salvà për l'eternità dal castigh ch'a l'avrìa merità. Crist a l'ha pagà a sò pòst. El Salm 130, ciamà ël Deprofondis [Dal përfond], che 'd sòlit as dovra pr'ij mòrt, a trata pitòst dij viv e dla gòj 'd coj ch'a l'han suplicà Dé 'd përdoneje. Da col moment anans a daran da vëdde a Dé quant ch'a na son arconnosent për ël mojen ëd na vita conforme a la volontà 'd Nosgnor ch'a smija a cola 'd Gesù, dzurtut ant l'amor e la misericòrdia. Sto-sì a l'é 'l messagi dla sconda letura. Manché nen ëd lese 'dcò j'àutre doi leture ch'a podreve lese a l'adressa indicà.

"Dal përfond i crijo a Ti, ò Signor. Ò Signor, scot-me! Dame da ment. It suplico: Misericòrdia! S'It visèisse 'd tùit ij pecà, gnun a podrìa presentesse dnans Ti. Ma Ti it ses bin dispòst a përdoné për che Ti it peusse esse onorà. I l'haj fiusa an Nosgnor, l'haj fiusa an chiel con tut me cheur. I speto soe paròle ëd compassion. I l'haj anvìa 'd Nosgnor, tanme le guardie a speto l'albadòr. Ò Israel susnìss ël Signor, përché 'l Signor a l'ha për nojàutri n'amor sensa fin e a l'è pì che dispòst a liberene. Chiel a rendrà Israel lìber da tute le conseguense dij sò pecà" (Salm 130).

"Për conseguensa, arnunsié a la faussarìa, e che ognidun a disa la vrità a sò pròssim, përchè i soma mèmber j'un dj'àutri. Quand ch'i seve anrabià, pijeve varda 'd nen fé 'd pecà: ch' ël sol ch'a tramonta av vëdda pì nen arsentì. Dé gnun-e ocasion al diav. Col ch'a robava, ch'a roba pì nen, ma pitòst ch'a travaja 'd manera onesta con soe man përchè a l'abia 'dcò da dene a col ch'a l'ha da manca. Che gnun discors dzonest a sorta mai da vòstra boca, ma col ch'a serv pr' edifiché e ch'a fasa 'd bin a coj ch'a lo scoto. E crussié nen lë Spirit Sant, ch'a l'ha marcave con sò cacèt pr' ël dì dla redension. Campé via (che da voi as na vëdda pì) l'ameror, la flin-a, l'ira, la maldicensa, ansema a ògni malìssia, e brajé nen! Fé ij brav e sie pien ëd grinor e 'd compassion j'un con j'àutri. Përdoneve j'un j'àutri coma Nosgnor a l'ha përdonave an Crist. Vardé bin lòn ch'a fà Nosgnor e peuj fé l'istess, përchè i seve coma 'd fieuj ch'a imito 'n pare ch'a-j veul bin. Vive na vita pien-a d'amor an seguitand l'esempi dël Crist. Chiel a l'ha vorsune bin tant da smonse për noi a Dé coma 'n sacrifissi d'odor agreàbil" (Efesin 4:25-5:2).

Del Salm 130 iv proponoma ambelessì la version ëstrumental tirà dal Saltéri 'd Ginevra, Nòstra tradussion piemontèisa, belavans, as peul nen cantessje dzora. As dovrìa fene na version métrica. Se quajdon ëd vojàutri a fussa bon a fela, i podrio mandeje lë spartì musical. A sarìa magnìfic realisela!

Coma esse pì nen ëd piàite facil... (Duminica 2 Agost 2015)

"I saroma pì nen piàita facil ëd gent furba ch'as na va 'n gir pr' ambrojé con ëd busiardarie ch'a smijo 'd vrità". Leture bìbliche dël lessionari - 2 Agost 2015 - Duminica dòp Pancòsta ch'a fa des: 2 Samuel (11:26-12:13); 11, 12; Salm 51 (1-13); Efesin 4 (1-13); Gioann 16 (24-35).

Vive ant l'unità. "Ora mi, ch'i son përzoné an càusa dël Signor, iv domando ch'i vive an manera degna dla vocassion ch'i l'eve arsèivùa, con tuta umiltà e grassiosità, con passiensa, soportand-ve con amor l'un l'àutr, avend a cheur ëd manten-e l'unità dlë spirit con ël vincol dla pas, un sol còrp e 'n sol ëspirit, coma ch'a-i 'é 'dcò un-a la speransa ch'av dà la vocassion ch'i l'eve arseivùa. An efet, a-i é un sol Signor, na sola fej, un sol batèsim, un sol Dé e Pare 'd tuti, ch'a sta dzura tuti, ch'a agiss an tuti e a l'é present an tuti.

Ognidun ëd nojàutri a l'ha 'rseivù la grassia conforma la mzura dël don che 'l Crist a l'ha daje. A l'é për lòn che la Scritura a dis: "Quand ch'a l'é montà an àut, a lo seguitavo ij sò përzoné e a l'ha fàit ëd don a j'òm". Ora, cost "a l'é montà", còs é-lo sëdësnò che prima a l'era calà giù ant le part pì basse dla tèra? Col ch'a l'é calà giù, a l'é l'istess ch'a l'é montà dzora tùit ij cej për ampinì l'univers antregh ëd chiel medésim. A l'é donca stàit chiel ch'a l'ha fàit che j'un a fusso dj'apòstoj, d'àutri ch'a fusso 'd profeta, d'àutri ch'a fusso d'evangelisator, d'àutri ancora ch'a fusso pastor e magister. A l'é parèj che chiel a preparà coj ch'a fan part dël pòpol sant për l'esercissi dij ministeri ch'a servo pr' edifiché 'l còrp ëd Crist, fin-a a tant che tuti i saroma rivà ant l'unità dla fej e dla conossènsa dël Fieul ëd Dé, ant lë stat ëd n'òm compì, ant la mzura dla taja përfeta dël Crist.

Parèj i saroma pì nen tanme 'd masnà nen madure. I saroma pì nen sbatù dëdsà e dëdlà quand ch'a bofo 'd vent ëd dotrin-e neuve. I saroma pì nen piàita facil ëd gent furba ch'as na va 'n gir pr' ambrojé con ëd busiardarie ch'a smijo 'd vrità. Al contrari, bin fondà ant la vrità e ant l'amor, i chërsroma an minca còsa vers ël Crist, ch'a l'é 'l cap. A l'é chiel ch'a fà che tut ël còrp a fonsiona ansema an manera armoniosa. Quand che ògni soa part a travaja coma ch'as deuv, sòn a giuta j'àutre part a chërse, e parèj ël còrp antregh a l'é san, a chërs e a l'é pien d'amor"

Ognidun ëd nojàutri a l'ha 'rseivù la grassia conforma la mzura dël don che 'l Crist a l'ha daje. A l'é për lòn che la Scritura a dis: "Quand ch'a l'é montà an àut, a lo seguitavo ij sò përzoné e a l'ha fàit ëd don a j'òm". Ora, cost "a l'é montà", còs é-lo sëdësnò che prima a l'era calà giù ant le part pì basse dla tèra? Col ch'a l'é calà giù, a l'é l'istess ch'a l'é montà dzora tùit ij cej për ampinì l'univers antregh ëd chiel medésim. A l'é donca stàit chiel ch'a l'ha fàit che j'un a fusso dj'apòstoj, d'àutri ch'a fusso 'd profeta, d'àutri ch'a fusso d'evangelisator, d'àutri ancora ch'a fusso pastor e magister. A l'é parèj che chiel a preparà coj ch'a fan part dël pòpol sant për l'esercissi dij ministeri ch'a servo pr' edifiché 'l còrp ëd Crist, fin-a a tant che tuti i saroma rivà ant l'unità dla fej e dla conossènsa dël Fieul ëd Dé, ant lë stat ëd n'òm compì, ant la mzura dla taja përfeta dël Crist.
Parèj i saroma pì nen tanme 'd masnà nen madure. I saroma pì nen sbatù dëdsà e dëdlà quand ch'a bofo 'd vent ëd dotrin-e neuve. I saroma pì nen piàita facil ëd gent furba ch'as na va 'n gir pr' ambrojé con ëd busiardarie ch'a smijo 'd vrità. Al contrari, bin fondà ant la vrità e ant l'amor, i chërsroma an minca còsa vers ël Crist, ch'a l'é 'l cap. A l'é chiel ch'a fà che tut ël còrp a fonsiona ansema an manera armoniosa. Quand che ògni soa part a travaja coma ch'as deuv, sòn a giuta j'àutre part a chërse, e parèj ël còrp antregh a l'é san, a chërs e a l'é pien d'amor" (Efesin 4:1-16).

Sto-sì a l'é përdabon col ch'a l'avìa da ven-e al mond (Duminica 26 luj 2015)

Leture bìbliche dël lessionari - 26 Luj 2015 - Duminica dòp Pascòsta ch'a fà neuv: 2 Samuel 11 (1-15); Salm 14; Efesin 3 (14-21); Gioann 6:1-21

Iv proponuma ancheuj Gioann 6:1-21. Scuté cò sto capìtol ambelessì: http://riforma.net/gioann/  (serché 'l capìtol 6). 

Gesù a dà da mangé ai sinch-mila

6:1 Dòp dë ste còse, Gesù a l'é andàit da l'àutra banda dël lagh ëd Galilea, visadì ël lagh ëd Tiberiade. 6:2 A lo seguitava motobin ëd gent për motiv ch'a vëdio ij segn miracolos ch'a fasìa an favor dij malavi. 6:3 Gesù, antlora, a l'é montà an s' na colin-a e a l'é setasse con ij sò dissèpoj. 6:4 Ora ël dì 'd Pasqua, ch'a l'era la festa dij Giudé, a l'era davzin. 6:5 Gesù, donca, a l'ha aussà lë sguard e quand ch'a l'ha vëddù cola grand massa 'd gent ch'a vënìa da chiel, a dis a Flip: "Dov é-lo che nojàutri i podrio 'ndé a caté 'd pan përchè sta gent-sì a l'abia da mangé?". 6:6 À disìa lòn për butelo a la preuva, përchè a savìa bin lòn ch'a l'avìa da fé. 6:7 Flip a l'ha rësponduje: "S'i l'avèisso bin për dosent dné 'd pan, a-i na sarìa ancora nen pro për dèjne mach na frisa a pr' un!". 6:8 E un dij Sò dissèpoj, Andrea, ël frel ëd Simon Pé, a-j dis: 6:9 "A-i é sì 'n fieul ch'a l'ha sinch panèt d'òrdi e doi pess, ma còs é-lo lòn për tanta gent?".

6:10 Antlora Gesù a dis: "Fé seté la gent". Ant col pòst a-i era motobin d'erba e la gent, donca, a l'é setasse. A-i na j'era apopré sinch-mila. 6:11 E Gesù a l'ha pijà ij panèt, a l'ha ringrassiane Dé e a l'ha dëstribuije a la gent ch'a l'era setà fin-a a tant ch'a na vorìo, e l'istess a l'ha fàit con ij pess. 6:12 Dòp ch'a l'han avù pro mangià, Gesù a dis ai sò dissépoj: "Rabasté ij tòch ch'a son d'avans, përchè gnente a na vada sgairà. 6:13 A l'han donca rabastaje, e a l'han ampinì dòdes cavagne dij tòch ch'a l'ero vansà a coj ch'a l'avìo mangiane.

6:14 Quand che la gent a l'ha vëddù 'l segn miracolos che Gesù a l'avìa fàit, a disìo: "Sto-sì a l'é përdabon ël profeta ch'a l'avìa da ven-e al mond". 6:15 Ma Gesù, quand ch'a l'ha capì ch'a vorìo ven-e a pielo për felo rè, a l'é artirasse ancora bel e sol an sle colin-e.

Gesù a marcia an sl'eva

6:16 Quand l'é fàsse sèira ij sò dissépoj a son calà al lagh, 6:17 a son montà an sla barca e a son passà dëdlà dël lagh da le part ëd Capernaum. A l'era già neuit che Gesù a l'era pa ancora vnù da lor. 6:18 E 'l lagh a l'é gonfiasse d'un grand vent ch'a bofava. 6:19 Quand ch'a l'avìo già remà tre o quat mija a l'han vëddù Gesù ch'a s'avzinava a la barca an marciand dzura l'eva e a na son restà bele che sbaruvà. 6:20 E Chiel a l'ha dije: "A l'é mi, àbie nen tëmma!". 6:21 A l'han arseivulo con piasì, donca, ant la barca, e sùbit apress, la barca a l'é abordasse andova ch'andasìo.

Gesù a l'ha vëddù ch'a-i era na gran furfa e a l'ha sentì na gran compassion për cola gent përché a j'ero coma 'd fèje sensa bërgé (19/7/15)

Leture bìbliche dël lessionari - 19 Luj 2015 - Duminica dòp Pancòsta ch'a fà eut: 2 Samuel 7 (1-14) Salm 89 (20-37); Efesin 2 (11-22); Marc 6 (30-34-53-56)

Gesù a dà da mangé a sinch-mila person-e. "Antlora j'apòstoj as son radunasse dantorn a Gesù, e a l'han contaje tut lòn ch'a l'avìo fàit e mostrà. A l'ha dije: "Ven-e e artireve [a part] ant un leugh desert, e arposeve un pòch; përchè a-i era tanta gent ch'a andasìa e a vnisìa an manera ch'a l'avìo gnanca 'l temp ëd mangé". Ansì a son andasne daspërlor ant un barchèt ant un leugh artirà. Ma tanti a l'avìo vëddù che as n'andasìo e l'han arconossùje. Alora a l'han pressase a pé da tuti ij paìs d'antorn e a son rivà là prima 'd lor. E Gesù, surtì dla bàrca, a l'ha vëddù ch'a-i era na gran furfa [ch'a lo spetava] e a l'ha sentì na gran compassion për cola gent, përché a j'ero coma 'd fèje sensa bërgé, e a l'ha butasse a mostreje tante còse. E dal moment che a l'era già tard, ij sò dissépol a son avzinasse a Chiel e a l'han dije: "Cost leugh a l'é desert, e a l'é già tard. Mandje vìa perch' as na vado ant ij paìs e ant le borgià d'antorn për catesse cheicòsa da mangé". A l'ha risponduje: "Deje vojàutri cheicòsa da mangé!". E lor a l'han dije: "Androm-ne caté 'd pan për dosent dné d'argent për deje da mangé?". E Chiel a l'ha dije: "Vaire 'd pan ch'i l'eve vojàutri? Andé a vardé!". Quand ch'a l'han savulo, a l'han dìt: "Sinch - e doi péss". Antlora a l'ha comandaje 'd fé seté la gent për grop an sl'erba vërda. Antlora a son setasse për grop ëd sent e 'd sinquanta përson-e. Peui Gesù a l'ha pijà coj sinch pan e coj doi pèss e, an vardand vers ël cel, a l'ha ringrassià De e a l'ha rompù 'l pan a tòch. Peui a l'ha dajlo aj sò dissépol përché a lo buteisso dëdnans a la gent, e a l'ha 'cò spartì ij doi pèss ëntra tuti. A l'han mangiane tuti e a son restà sodisfàit. A l'han ëdcò rabastà i tòch vansà 'd pan e 'd pèss - dodes cavagne pien-e.  Coj ch'a l'avìo mangià 'l pan a l'ero sinch mila òm [për nen conté le fomne e ij cit]" (March 6:30-44).

Benedission spirituaj an Crist (Duminica 12 Luj 2015)

Leture bìbliche dël lessionari për ël 12 Luj 2015 - Duminica dòp Pascòsta ch'a fà set: 2 Samuel 6 (1-5; 12-19); Salm 24; Efesin 1:3-14; March 6:14-29

Për coj ch'a son an comunion con ël Signor e Salvator Gesù Crist a son guernà 'd benedission stravise. A son cole che l'apòstol Pàul a na fà la lista ant ël prim capìtol ëd soa litra ai cristian d'Efeso, un-a dle leture bibliche 'd costa duminica. As podrìa pròpi disse: coma ch'as podrìa mai esse indiferent a coste meravije 'd Sò amor? Andomne a la dëscuerta.

Benedission spirituaj an Crist

1.3 Ch'a sìa benedì Dé, Pare 'd Nosgnor Gesù Crist, ch'a l'ha benedine 'd ògni benedission spiritual dël Cel an Crist, 1:4 përché Chiel a l'ha sernune an Crist prima dla fondassion dël mond, parèj ch'i fusso sant e sensa rimpròcc dëdnans a Chiel për amor. 1:5 Dé a l'ha falo quand ch'a l'ha predestinane a l'adossion coma Sò arditè legaj për ël mojen ëd Gesù Crist, conforma la compiasensa 'd Sò volèj, 1:6 a la làuda dla glòria 'd Soa grassia, cola ch'a l'ha acordane an Sò car Fieul. 1:7 An Chiel i l'oma la redension për Sò sangh, ël përdon dij nòstri pecà second le richësse 'd Sòa grassia, 1:8 cola ch'a l'ha dane sensa misura con ògni sapiensa e inteligensa. 1:9 Dé a l'ha falo quand ch'a l'é compiasusse 'd fene conòsse 'l misteri 'd Sò volèj, col ch'a l'avìa proponusse 'd realisé an Crist. 1:10 Sossì a l'é 'l proponiment: quand che 'l temp adatt a fussa rivà, chiel a l'avrìa 'rcapitolà tut an Crist, tant lòn ch'a-i é ant ij cej, che lòn ch'a l'é an sla tèra. 1:11 An Crist, ëdcò nojàutri i soma stàit reclamà coma 'd gent ëd Soa pertinensa, dàit ch'i soma stàit predestinà conforma 'l propòsit ëd Col ch'a compiss ògni còsa second ij sò proget, 1:12 parèj che nojàutri, ch'i soma stàit ij prim a speré an Crist, a l'avèisso portà 'd làuda e 'd glòria a Dé. 1:13 A l'é për lòn che quand ch'i l'eve sentù la paròla dla vrità, l'evangeli 'd vòstra salvëssa, e ch'i l'eve chërdù an Crist, i seve stàit marcà con ël sigil dlë Spirit Sant ch'a l'era stàit promëttù. 1:14 A l'é Chiel la capara 'd nòstra ardità, fin-a a la redension completa ëd lòn ch'a l'é dël Signor, a la làuda 'd Sòa glòria.

"...përchè i m'elevèissa nen, a m'é stàita ficà na spin-a ant la carn" (Duminica 5/7/15)

A Corinto ël servissi dl'apòstol Pàul a l'era stàit butà an question. D'àutri, ch'a j'ero mach ëd blagheur, as vantavo 'd grande ròbe. Pàul, antlora a dis: "Antlora lasseme vanté 'n pò 'dcò mi". A savìa che vantesse a l'era nen bel: për lòn ëd sòlit a lo fasìa nen, ma a l'avrìa bin avù rason ëd felo, përchè chiel a l'era përdabon l'òm che Nosgnor a l'avìa mandà. Peuj a dis: "Parèj, përchè i m'elevèissa nen, a m'é stàita ficà na spin-a ant la carn: un mëssagé 'd Satana ch'am dèissa 'l torment përch' i montèissa nen sle scagn a vanteme". Leture për ël 5 Luj 2015- Duminica dòp Pancosta ch'a fà ses: 2 Samuel 5 (1-5; 9-10); Salm 48; 2 Corint 12 (2-10); March 6 (1-13).

La spin-a ant la carn ëd Pàul. 12:1 Im vëddo obligà a vanteme. I lo sai ch'a sarìa nen na ròba da fé, contut i veulo arfeme a le vision e a j'arvelassion ch'ël Signor a l'ha acordame. 12:2 I conòsso n'òm an comunion con ël Crist che, a-i é quatòrdes agn fà, a l'é stàit portà sù fin-a al ters cel. Ciameme nen s'a l'é stàit ant ël còrp o fòra dal còrp: mach Nosgnor a lo sa. 12:3 Èh, mach Dé a sa s' i j'era ant mè còrp o fòra dal còrp: mi i lo sai nen. 12:4 A l'é sicur ch'i son stat portà sù 'n paradis e i l'hai sentì 'd còse ch'a sario malfé a butesse an paròle, còse che a gnun uman a l'é consentì 'd conteje. 12:5 Ëd cola esperiensa im na podrìa bin vanteme, ma i lo farai nen. Im vanterai mach ëd mia dëbolëssa. 12:6 An tute manere, s'i volèissa vanteme, i saria nen un fòl, përch 'i diso la vrità. Contut, i lo faso nen përchè i veulo nen che quajdun as fassa n'opinion ëd mia person-a ch'a sia pì granda'd lòn ch'a l'ha vëddume fé o ch'a l'ha sentì dì 'd mi, 12:7 bele s'i l'hai arseivù cole strasordinàrie arvelassion da Dé. Parèj, përchè i m'elevèissa nen, a m'é stàita ficà na spin-a ant la carn: un mëssagé 'd Satana ch'am dèissa 'l torment përch' i montèissa nen sle scagn a vanteme. 12:8 I l'hai ciamaje tre vire al Signor ch'am na liberèissa, 12:9 ma chiel a l'ha dame costa rispòsta: "Tut lòn ch'it l'has da manca a l'é mia grassia [3] e gnente 'd pì. Mè podej a travaja mej ant la dëbolëssa [4]. A l'é parèj che mi i veul vanteme dzurtut ëd mie dëbolësse, përché 'l podèj 'dël Crist a peussa travajé an mi. 12:10 A l'é për motiv ëd lòn ch'i aceto con piasì le dëbolësse, ch'am faso dij tòrt, tùit j'antrap, le persecussion e tùit ij sagrin ch'i l'hai për càusa dël Crist. Përché pròpi quand ch'i son débol i peusso dì d'esse fòrt.